農曆新年可以話係「見家長」嘅最佳Timing，想喺一眾長輩嘅心目中留下深刻而難忘嘅好印象，就要參考以下宜忌，為拜年做足準備！ 衣著打扮 宜：大方得體 不論男女，打扮應以樸素斯文為主；有化開妝嘅女士化返個淡妝，望落精精神神就足夠。 忌：過於浮誇 話晒都係傳統喜慶日子，全身黑白就可免則免；而低胸衫同短裙亦唔夠莊重。另外化妝時輕手啲，切忌濃妝抹艷。 新年賀禮 宜：投其所好 買賀禮前先向另一半瞭解對方父母喜好，再揀選佢哋用得著嘅賀禮，令長輩覺得你花過心思。 忌：唔實用兼過於貴重 第一次見面未必適合送過於貴重嘅禮物，有機會嚇親世伯伯母之餘，佢哋亦未必啱用，造成浪費就唔好啦。 溝通交流 宜：保持禮貌 入屋之後記得清清楚楚咁同世伯伯母以及其他長輩打招呼，跟手講多幾句祝賀說話，自然可以輕易加分；再全程保持微笑，畀人感覺你和藹兼親切。 忌：零交流或開籠雀上身 初次見面難免緊張，但絕對唔可以同長輩零交流，但亦都唔好吱吱喳喳講唔停，令長輩覺得你無禮貌。 言行舉止 宜：成為禮儀大使 食飯時等長輩起筷先，同時保持良好食相；如果長輩邀請你一齊打麻雀，適當時候識做咁輸少少，等佢哋高興吓。 忌：無大無細 [...]